KANEN

EN INOUR DE

SANT KORNELI

DISKAN

A lein en nean, sant Korneli,
Taulet ur sel ar hun mizér.
Pedet eid omb, nihou suppli,
Gouarantet-ni doh peh danjér.

1

Inouramb ol, Kréchenion,
Hiniù hag épad hun buhé,
Inouramb ol er sant Patrom
E zou reit t'emb é lein en né.

2

Studiamb é vuhé santél
Ha sellamb doh t'hi pen d'er ben;
Diskamb get hou derhel fidél,
Fidél de Zoué ha d'é lézen.

3

Er gér a Rom é ma gannet,
Én ur famill doh Doué sentus.
A vihanik en dès disket
Karein hag inourein Jésus.

4

Disket eùé d'hou pugalé,
Hui, tadeu ha mameu krechen,
Disket dehé inourein Doué,
Héli ha karein é lézen.

5

Doh en droug, doh er fal hantiz
Korneli perpet e bellas,
Hag, épad ol é iouankis,
Ker pur el un Æl e viuas.

6

Mar vennet tanhoat er guir beah
O tud iouank e viù ér bed,
Doujet er fal gompagnoneah,
Karet er vertu a burtèd.

7

Ur vuhé ker pur, ker santél
D'en Eutru Doué en dès plijet,
Ha Korneli d'ur stad ihuél,
D'er stad a véleg zou galùet.

8

De Zoué hum ras bean ha gredus,
Pa hanaùas é volanté,
Hag é dad, é vam, de Jésus
Er gloestras ind-memb lan a joé.

9

Korneli, deit devout béleg,
E zou fidél d'é zevérieu;
Bamdé hemb doujans é predeg
Eit gouni de Zoué inéanneu.

10

Oh ! Péh un nerh én é gonzeu
A pe bredeg én un iliz !
Er béherion e chuill dareu,
Er baianned hum gonvertis.

11

Neoah Satan, lan a gounar,
Ne lausk ket en Iliz é peah :
En tirand sé kri ha barbar
E ven dismant er grecheneah.

12

Kent pèl ha tampest ha brezél
E saù ér grecheneah abéh,
Ha goed er grechenion fidél
E rid a boulad é peb téh.

13

Vikél Jésus-Krouist ar en doar
Get paud aral zou arrestet,
Ha tuchant, o chiff, o glahar !
É gér a Rom é ma lahet.

14

Doh en Iliz lan a druhé,
Doué nezé, aveid hi hondui.
E choéj é misk é vugalé
Er béleg santél Kornéli.

15

Er Sant, lan a humilité,
Un inour ker bras ne ven ket;
Mès én despet d'é volanté,
Pab, dré en ol é ma hanùet.

16

D'ur garg ker bras ha ker santél
A p'en dé saùet Korneli,
Ag é zeved, bugul fidél,
E kemér er brasan soursi.

17

Hemb doujein er bersékusion,
Er marù hag ol en tourmanteu,
Ean e zihuen er grechenion
Hag ou sekour én ou foénieu.

18

Mès en tampest hag er brezél
Ne hrant nameit kreskat bamdé
Ha goèd er grechenion fidél
A bep tu e rid a neùé.

19

Get mui a gounar é pep lèh
É klaskér ol er fidéled,
Ha kent pèl er pab memb e gouéh
Étré dehorn en tiranded.

20

Enep de servitour Jésus
En ampeleur, lan a furi,
E hra torrein, o tra eahus !
Ol é zent de sant Korneli.

21

Kentéh soudarded didruhé
Er stleij de dampl er faus douéed,
Eit gobér dehou nahein Doué
Hag inourein en idoled.

22

Mès Korneli e saù é voéh,
E lar get kouraj ha get gred :
Kentoh andur er marù mil guéh
Eit adorein er faus douéed.

23

Nezé en tirand é furi
Hum daul akerh d'é fallanté,
E hra skoein er pab Korneli,
Er hondan de gol é vuhé.

24

Uigent soudard ha deu open,
Dré er sant de Zoué gouniet,
Stleijet get hou d'er memb tachen,
Ar dro get hou zou dibennet.

25

Guèl oé get hé kol ou buhé,
Eit ou lézen chuill ol ou goed,
Kentoh aveit offansein Doué
Hag inourein en idoled.

26

É andur er marù eahusan,
É kuitat ur vro a vizér,
Ou dés kavet, é lein en nean,
Ur vuhé aral lan a hloér.

27

Hemb doujein en tirand kruél,
Ur voéz devot, Lucin hanùet,
E cherras er horveu santél,
Ou hasas d'en doar beniget.

28

Sant Korneli, é lein en nean,
E joeis ag ur boneur hemb par,
Mès get er garanté vrasan
É ra d'emb sekour ar en doar.

29

Saùamb enta hun deulagad
Tréma hun patrom glorius;
Inouramb ean a galon vad
Ha get ur volanté gredus.

30

Diskoamb dehou o hun mizér,
Ol peuranté hun inéanneu
Goulennamb get hou er viktoér
Ar en diaul get é ol ardeu.

31

Tud a vor, kèh marteloded,
A p'hum gavet ér fal amzér,
Pedet bean hou Patrom karet,
Hag ean hou tennou a zanjér.

32

Aveit oh-hui, labourizion
É misk ol en donézoneu,
Goulennet get hou sant Patrom
Ma vou fréhus hou labourieu.

33

Mar hues lonned en hou kreùiér,
Oh ! get hou nezé goulennet
Ma pellei doh té en danjér,
Ma pellei doh té er hlinùet.

34

Mès goulennamb ol drest peb tra
ma talhehemb fidél de Zoué,
Eit ma vehemb un dé e za
Eurus get hou é lein en né.

IMPRIMATUR :
É Guénèd, en uigent a vis Œst,
J. LE GUÉNÉDAL,
VIK. JEN.

IMP. E. T. SAINT-JOSEPH - VANNES - 9-56